(Lk.2,22-38)

Tempo a yega, ku Hosé y Maria tabatin di kumpli ku e seremonianan di purifikashon di Maria... P’esei, nan a hiba Hesus Herusalèm pa ofres’E na Señor. Esaki tabata kuadra ku loke lei di Señor ta bisa: “Tur promé yiu homber mester ta dediká na Señor”. Den e tempo ei, un sierto hòmber, yama Simeon, ta biba na Herusalèm. E tabata un hende husto y deboto... Spirito Santo tabata kuné. Spirito Santo a revelá Simeon ku lo e no muri prome ku e mira e Media, ku Señor a priminti. Guiá pa Spirito Santo, el a drenta tempel. Ora e mayornan di e Yiu Hesus a drenta tempel kun’E…, Simeon a tuma e Yiu den su brasa y a alabá Dios bisando:”Awor bo por laga bo kriá bai na pas, Señor, di akuerdo ku bo promesa. Pasobra ku mi mes wowo mi a mira e salbashon, ku Bo a prepará den bista di tur pueblo; e lus ku lo trese revelashon pa paganonan, y gloria di Israël, Bo pueblo”. Mayornan di Hesus a keda asombrá di tende loke Simeon a bisa tokante dje Yiu. Simeon a bendishoná nan. Despues Simeon a bisa Maria, su Mama: “E Mucha aki ta destiná pa pone hopi hende na Israël kai y hopi otro lanta. Lo E sirbi komo un señal controversial. Pa asin’ei pensamento di hopi hende sali na kla. Y abo lo sufri doló komo si fuera un spada ta traspasá bo kurason”. Tambe tabatin un sierto profeta Ana, yiu di Fanuel, di tribu Asher. E tabata di edat hopi avansá… Nunka e no tabata sali for di tèmpel, ma e tabata sirbi Dios di dia y anochi, ku orashon y ayuno. Awor Ana tambe a yega na e momento ei y el a yama Dios danki pa loke a sosodé. Despues el a konta di e Yu na tur hende, ku tabata anhelá pa Dios liberá Herusalem. Despues ku nan a hasi tur kos nesesario pa kumpli ku lei, nan a bai nan pueblo Nazarèt, na Galilea, bèk. E Yiu a krese y a bira dia pa dia mas fuerte, yená ku sabiduria; grasia di Dios tabata kun’E.

(Lc 2, 41-51) 

Mayornan di Hesus tabatin kustumber di bai Herusalèm tur aña pa selebra fiesta di Pasku. Tempu Hesus tabatin diesdos aña nan a bolbe bai Herusalèm, di akuerdo ku nan kustumber. Ora e dianan di fiesta a pasa y Su mayornan tabata na kaminda pa bai kas bèk, e mucha hòmber Hesus a keda Herusalèm sin nan sa. Nan a sigi biaha henter un dia. Despues nan a bai buska Hesus serka nan famia y konosínan. Komo nan no por a han’E, nan a bira bèk bai busk’E na Herusalèm. Riba di tres dia nan bin han’E den tèmpel, sinta meimei di maestronan di lei. E tabata skucha nan y hasi nan sierto pregunta. Tur ku tabata skuch’E, a keda babuka di Su konosemento y di tende Su kontestanan. Su mayornan a mir’Ee, nan a keda asombrá y su mama a bis’E: “ Mi Yiu, ta kiko e kos ku bo a hasi ku nos aki? Ami ku Bo tata tabata buska Bo tur anshá”. Hesus a bisa nan: “Pakiko boso a buska Mi? Boso no sa ku ta den kas di mi Tata Mi mester ta?”. Ma nan no a komprondé loke El a bisa nan. Hesus a bai Nazarèt bèk ku nan y E tabata obedesido na nan. Su Mama a warda tur e kosnan aki den su kurason. Hesus a bira grandi y a krese tambe den sabiduria: E tabata bon mirá tanto serka Dios komo serka hende.

(Mt 3,13-17) 

Den e tempo ei, Hesus a bini for di Galilea serka Huan na riu di Yordan pa Huan batis’E. Huan kier a stòp E, p’esei, el a bis’E: “Ta ami mester laga aBo batisá mi, anto aBo ta bini serka Mi?”. Ma Hesus a kontest’é: “Laga bai asina numa, pasobra ta di e forma aki nos mester kumpli ku tur loke ta boluntat di Dios”. E ora ei Huan a batisá Hesus numa. Nèt ora Hesus tabata Sali for di awa, shelu a habri p’E, y El a mira Spiritu di Dios a baha riba dj’E manera un palomba. A zona un stèm for di shelu: “E ta mi Yiu stimá, E ta legria di mi kurason.

(Huan 2, 1-11)

Dos dia despues ku Hesus a topa Natanaèl, tabatin un kasamento na Kana di Galilea. Hesus su mama tabata na e kasamento. Nan a kombidá Hesus tambe huntu ku Su disipelnan. Ora ku biña a kaba, Hesus Su mama a bis’E: “E hendenan no tin mas biña!”. Hesus a kontest’E: “Mi Mama, ta abo mester bisa Mi kiko Mi tin ku hasi? Mi ora no a yega ainda!” Hesus su Mama a bisa e kriánan: “Hasi loke E bisa boso”. Pa e motibu di purifikashon, tabatin seis tinashi. Kada tinshi por a tuma ochenta pa shen liter di awa. Hesus a bisa e kriánan: Yena e tinashinan ei ku awa”, y e kriánan a yena nan te na rant”. E ora ei El a bisa nan: “Saka poko awa y hiba pa e maestro di seremonia”. Y nan a hiba e awa pa e hòmber. Ora e maestro di seremonia a purba e awa ku a kambia bira biña, e la manda yama e esposo. El a bisa e esposo: “Tur hende ta parti e mihó biña promé y despues ora e hendenan a bebe basta kaba, nan ta parti e biña di ménos kalidat. Ma abo a warda e mihó biña te awor!” Asin’aki, Hesus a hasi Su promé señal milagroso: ei, na Kana di Galilea. El a mustra Su gloria y Su disipelnan a kere den djE.

Tata Celestial, mara Bo por yuda nos biba uní ku otro pa medio di fe den Hesu-Kristu, bo Yiu, y asina nos por forma un komunidat di rumannan. Amèn.

(Mk 1,15; Lk 4,16-22. 32-62) 

Hesus a regresá Galilea yená ku poder di Spirito Santo. Su fama a plama den henter e bisindario ei. Hesus tabata anunsiá e Bon Notisia di Dios. E tabata bisa: “E dia ayega: reino di Dios ta serka! Kombertí y kere den e Bon Notisia!”. E tabata siña e hendenan den nan snoanan y nan tur tabata gab’E. Hesus a bai Nazarèt, kaminda El a lanta komo mucha, y, riba diasabra, El a bishitá snoa manera kustumber. El a lanta para pa E lesa Santa Skritura. Nan a dun’E e ròl di e buki di profeta Isaïas pa lesa. Hesus a habrí e ròl di buki y a haña e torso ku ta bisa: “Spirito di Señor ta riba Mi, p’esei, El a skohe Mi pa anunsiá e Bon Notisia na pòbernan. El a manda Mi proklamá libertat pa prezunan; bista pa siegunan; y esnan oprimí, libertat. Mi mester anunsiá e era di Señor Su grasia”. Hesus a lora e ròl ser’é bèk, dun’é na e asistente di snoa y kai sinta. Tur hende den snoa a keda ku nan bista fihá riba djE. E ora ei El a kuminsá papia ku nan: El a bisa: “Awe e palabranan ku boso a tende, a keda kumplí”.

Oh Señor, nos Dios, duna nos e grasia di por kere den Evangelio di bo Yiu Heus y asina nos biba di akuerdo ku Su siñansa. Amèn.

(Lk.9,28-36) 

Den e tempo ayá, Hesus a bai ku Pedro, Huan y Hakobo riba un sero bai resa. Segun Hesus tabata resa, su kara a kambia y su paña a bira un blanko masha briante. Diripiente tabatin dos hòmber ta papia kun’E. Nan tabata Moises y Elias, ku a paresé den gloria. Nan tabata kombersa kun’E tokante kon e mester bandoná e mundo aki na Herusalèm. Pedro y su kompañeronan tabata duro drumí y ora nan a spièrta, nan a mira Su gloria y e dos hòmbernan pará banda di dj’E. Segun e hòmbernan tabata bai, Pedro a bisa Hesus: “Maestro, esta bon ku nos ta aki! Laga nos traha tres tènt: un pa bo, un pa Moises y un pa Elías”. Pedro no tabata sa kiko e tabata papia. Segun e tabata papia, unnubia a bin para riba nan. Miedo a poderá di e disipelnan, miéntras e nubia tabata tapa nan. Nan a tende un stèm for di e nubia bisa: “Esaki ta mi Yiu skohí, tende di dj’E. Despues ku e sonido a pasa, nan a haña Hesus E so. Nan a keda keto y no a konta niun hende, den e tempo ei, loke nan a mira.

Tata Santo, laga nos di por skucha palabra di Bo Yiu Dibino ku fe bibo, pa por yega na un bida transfigura pa medio di Bo Spirito. Amèn.

(Huan 13,1-2; Mk 14,12-16.22-26; Lk 21,14-20)

Fiesta di Pasku tabata serka y Hesus tabata sa ku Su ora a yega pa bai laga e mundo aki y bai serka Tata. Te na final, El a sigui mustra Su amor pa esnan ku riba e mundo aki tabata pertenesé n’E. Riba promé dia di fiesta di pan sin zuurdeg, ora ta mata e lamchi di sena di Pasku,  Hesus Su disipelnan a puntr’E: “Unda bo ke pa nos bai prepará sena di Pasku pa Bo kome?” Hesus a manda dos disipel bai y ordená nan: “Drenta siudat. Aya boso lo topa un hòmber ku ta karga un tinashi di awa; siguié. Bisa doño di e kas kaminda e drenta: “Maestro ta puntra: unda e kamber kaminda Mi por tene sena di Pasku ku Mi disipelnan ta?” E doño di kas lo mustra boso un kamber grandi ariba, mueblá y kla prepará kaba; ei boso mester prepará tur kos pa nos”. Miéntras nan tabata kome, Hesus a bisa Su disipelnan: “Mi tabatin masha gana di kompartí e sena di Pasku aki, hunto ku boso, promé ku Mi sufri. Pasobra, laga Mi bisa boso: Lo Mi no tuma parti n’e atrobe, te ora e haña su nifikashon kompleto den Reino di Dios”. E ora ei, Hesus a kohe pan; El a gradisi Dios, kibra e pan y duna Su disipelnan: “Tuma, esaki ta Mi Kurpa, ku ta entregá pa boso. Hasié pa boso kòrda riba Mi”, El a bisa. Despues, El a kohe un kális di biña, yama Dios danki pa e kális y a pas’é pa nan y tur a bebe for di dje. El a bisa: “Tuma y kompartí ku otro. Esaki ta Mi Sanger, ku ta konfirmá e aliansa; e Sanger ku lo ta drama pa hopi hende”. “Mi ta duna boso un mandamento nobo: Stima otro! Manera Ami a stima boso, asina boso tambe mester stima otro. Si boso stima otro, tur hende lo sa ku boso ta mi disipelnan”. Desues di a kanta himno, nan a Sali pa Sero di Oleifi…

(Mk 14,32-52) 

Ora Hesus ku Su disipelnan a yega un lugá ku yama Getsémani, Hesus a bisa Su disipelnan “Keda sinta akí, túresten Mi ta bai resa”. El a bai ku Pedro, Hakobo y Huan; El a kuminsá sinti miedo y a bira anshá. El a bisa nan: “ Mi ta sintí un tristesa asina grandi den mi kurason ku Mi por muri, keda aki, ma keda alerta”. Hesus a bai un tiki mas leu y a tira Su kurpa abao na suela. E tabata resa pa, si ta posibel, e ora di sufirmento pasa bai lag’E. El a bisa: “Abbá, oh mi Tata! Pa Bo tur kos ta posibel; tuma e kális di sufrimento aki for di Mi. Pero no loke Ami ke, ma loke aBo ke”. Hesus a bai bèk ta haña e tres disipelnan drumí na soño, El a bisa Pedro: “Simon, bo ta drumí, no?...Boso mester resa pa boso no kai den tentashon. Mi boluntat ta kla, sí, ma mi naturalesa humano ta débil”. Hesus a bolbe bai hasi e mesun orashon., Ora El a bin bèk,..y a bisa nan ”Boso ta sigui drumi y sosegá numa? Ya tur kos a pasa. E ora a yega. Nan ta entregá e Yiu di hende den man di pekadónan. Lant’ariba, laga nos ban; esun ku a traishoná Mi, ta serka di yega”. Hesus no a kaba di papia ainda, ku ata Hudas,un di e diesdos disipelnan, a yega…E traidor, a palabrá un señal ku nan; el a bisa nan: “Esun ku mi kumindá ku un sunchi, t’E, ku’E prezu y bai kunE bon ten’E pa E no hui”. Asina anto Hudas a bai derechitu serka Hesus. E la kumind’E ku un sunchi y a bis’E: “Maestro!” Nan a kue Hesus tene y arest’E.

(Mk 15,16-20; Huan 19,15-16)

Sòldánan a hiba Hesus den patio di Pretorio, esta den palasio di gobernadó y a yama e otro sòldánan di e grupo bin huntu. E sòldánan a bisti Hesus un paña kòrá pus y un korona di flèktu di sumpiña riba Su kabes. E sòldánan a kuminsá salud’E ku e palabranan aki: “Biba Rei di hudiunan!” E sòldánan a dal E riba Su kabes ku pida palu, skupi’E den Su kara y kai na rudia p’E den forma di adorashon. E sòldánan a duna Hesus un pida palu tene den Su man drechi y a hasi bòfòn di dj’E (Mt. 27,29). E sòldánan a kupi Hesus den Su kara, kohe pida palu dal E riba Su kabes (Mt. 27,30). Tabata diesdos’or di mèrdia riba dia di preparashon pa Pasku. Pilato a bisa e hudiunan: “Ata boso Rei!” (Huan 19,14). E hudiunan a grita: “Kaba kunE! Kaba KunE! Krusifik’E!” Pilato a puntra nan: “Krusifiká boso Rei?” E gransacerdotenan a respondé: “Ta un rei so nos tin: emperador!” E ora ei Piulato a entregá Hesus na nan, pa nan krusifik’E. Nan a bai ku Hesus. Despues di hasi bòfòn di Hesus asin’ei, e sòldánan a kita e paña kòrá pus, bisti’E su mes paña y bai kun’E pa krusifik’E.

Oh Señor Hesus, ora hende rondoná nos kurason ku sumpiñanan, yuda nos hasi bon na esnan ku ta heridá nos. Amèn.

(Lk.23,26-33; Huan 19,17).

Ora El a Sali, E mes tabata karga su krus. Ora nan a bai ku Hesus pa krusifik’E, nan a kontra ku un sierto Simon, un hòmber di Sirene, ku tabata riba kaminda for di kunuku. Sòldánan a kohe e hòmber tene, pone e krus riba djé y lag’é karga e krus tras di Hesus. Un grupo grandi di e pueblo tabata sigui’E y tabatin algun muhé ta lamentá y yora p’E. Hesus a drei wak nan y bisa: “Muhénan di Herusalèm, no yora pa Mi, ma yora pa boso mes y pa boso yiunan. Pasobra a yega un dia ku hende lo bisa: “Felis ta e muhé ku no por haña yiu, ku nunka no a karga un yiu, ni nunka no a duna un yiu pechu!” E ora ei hende lo bisa seronan: Sero kai riba nos! Y e seritunan: Serito skonde nos!’ Pasobra si ta asina nan ta hasi ku e palo ora e ta bèrdè, ta ki nan lo hasi, ora e seka?” Tambe nan a hiba dos otro hòmber kriminal pa mata nan pareu ku Hesus.

(Lk 23,34-47; Huan 19,18-30)

Ora nan a yega e lugá ku yama ‘Karpachi’, na hebreo yamá ‘Gólgota’, nan a krusifiká Hesus. E dos kriminalnan tambe nan a krusifiká, un na Su banda drechi, e oro na banda robes. Hesus a resa; “Tata, pordoná nan, pasobra nan no sa kiko nan ta hasi”. Sòldánan a tira dou pa wak loke kada un ta haña di Su paña. Nan tabata bisa: “Otro hende si E por a salba! Lag’E salba Su mes, si E ta e Mesias ku Dios a skohe! Si t’aBo ta Rei di hudiunan, salba Bo mes”. Na kabes di Hesus Su Krus tabatin un bòrchi y Pilato a laga skibi riba e bòrchi: “Hesus di Nazarèt, Rei di hudiunan”. Un di e kriminalnan a skual e otro y a bis’é: “Bo no tin temor di Dios? Abo a risibí mesun kastigo kun’E y anto pa nos e kastigo ta hustu, pasobra nos ta haña loke nos meresé. Ma E nos a hasi nada malu!”. Despues el a bisa Hesus: “Hesus, kòrda riba mi, ora Bo drenta den Bo reino”. Hesus a kontest’é: “Mi ta sigurá bo: Awe mes lo bo ta huntu ku Mi den paraiso!” Túrèsten Hesus Su Mama tabata pará na Su Krus. Ora Hesus a mira Su Mama y Su disipel stimá pará einan, El a bisa Su Mama: “Mama, ata bo yiu hòmber!” Despues Hesus a bisa e disipel: “Ata bo Mama!” For di e ora ei e disipel a tuma Maria den su kas. Tabata mas òf ménos diesdos’or di mèrdia y a reina un skuridat den henter e pais te tres’or di atardi. Solo a stòp di bria y kortina den tèmpel a sker na dos. Despues Hesus tabata sa ku tur kos tabata kumplí. Pa kumpli ku Skritura, El a bisa: “Mi tin set!” Tabatin un butishi ku biña zuur. Nan a muha un spòns ku e biña, pon’é na un taki di un mata, ku yama hisopo, y pon’é na Hesus Su boca. Hesus a bebe e biña y a bisa: “Ta kumpli!” Despues Hesus a dal un gritu duru: ‘Tata, den Bo man Mi ta entregá mi Spiritu”. Despues di e palabranan aki El a muri. E kapitan romano ku a mira loke a pasa, a glorifiká Dios y bisa: “E homber aki tabata un hòmber hustu di bèrdè!”

(Huan 21,1-9) 

Riba promé dia di siman, mainta trempan, miéntras tabata skur ainda, Maria Magdalena a bai bishitá e graf. El a mira ku a kita e piedra ku tababata poné na boka di e graf. El a kore bai serka Simon Pedro y e disipel stimá di Hesus y a bisa nan: “Nan a kohe kurpa di Señor bai kunE y nos no sa unda nan a pon’E!” Pedro y e otro disipel a sali bai e graf. Nan dos tabata kore huntu, ma e otro disipel a kore baia laga Pedro y a yega na e graf promé. El a buk wak paden y a mira e pañanan di lenen, ma e no a drenta. Simon Pedro, ku tabata bini su tras, a pasa bai paden. El a mira e pañanan di lenen y e lensu ku a mara na Hesus su kabes poné un banda. E lensu no tabata huntu ke e otro pañanan, ma e tabata doblá poné un kantu. E ora ei, e disipel ku a yega promé, tambe a drenta. El a mira y a kere. Echo ta ku na e momentonan ei ainda nan no a komprondé e palabranan di Skritura ku ta bisa ku Hesus mester a lanta for di morto. Maria Magdalena tabata pará pafó di sepulkro, yorando. Su wowo, tur na lágrima, el a baha su kabes, pa tira un bista den sepulkro. Aya el a mira dos angel, bistí na blanku, sintá un na kabes, un na pia di e lugá, kaminda kurpa di Hesus tabata pon’é. Nan a puntr’é: “Muhé, pakiko bo ta yora?” Maria a respondé: “Nan a kohe kurpa di mi Señor, y mi no sa unda nan a hib’E”. Ora el a bira wak su tras y a mira Hesus pará ei, ma e no tabata sa ku t’E. Hesus a puntr’é: “Muhé, pakiko bo ta yora?” Keriendo ku e persona tabata e hardinero, Maria a bisa: “Señor, si t’aBo a koh’E, bisa mi, na unda Bo a but’E, pa mi bai busk’E atrobe”. “Maria!”, Hesus a bisa. Maria fihando su bista riba dj’E, a bisa na hebreo: “Raboni! Maestro!”. “No toka mi!”, Hesus a bisa, “pasobra ainda Mi no a bolbe serka Tata. Pero bai serka mi rumannan, y konta nan, ku pronto lo Mi bolbe serka Esun, Ku ta mi Tata y boso Tata, mi Dios y boso Dios”. Maria Magdalena a bai avisá e disipelnan, ku el a mira Señor, y a konta nan loke Señor a bis’é.

(Ech 1,1-11) 

Teófilo, den mi promé buki mi a skibi tokante tur kos ku Hesus a hasi y siña, for di tempo ku el a kuminsá ku Su mishon te dia a tum’E den shelu. Promé ku el a bai shelu, El a duna e hombernan, ku el a skohe komo Apostel, su instrukshonnnan pa medio di Spirito Santo. Na nan, el a paresé diferente biaha, durante kuarenta dia largo, despues di Su morto. El a proba nan, na un manera kombinsente, ku E tabata bibo y El a papia ku nan tokante reino di Dios. Ora E tabata huntu ku nan, el a duna nan ordu pa no bandoná Herusalem. Su promesa. Huan tabata batisá ku awa, ma aki un par di dia lo batisá boso ku Spirito Santo”. Esnan ku tabat’ei a puntr’E: „Señor, awor Bo ta bai restorá e reino pa Israël?” El a kontestá: “No ta toka boso pa sa e tempo y ora ku Tata a stipulá a base di Su outoridat. Ma boso lo risibí poder, opra Spirito Santo baha riba boso y boso lo ta mi testigo na Herusalem, den henter Hudea y Samaría, sí, te na fin di mundo”. Despues di e palabranan ei, a hals’E según nan tabata mira; un nubia a kit’E fo’i nan bista. Mientras Hesus tabata bai laria asina y nan a keda ku nan wowo fihá na laria, diripiente tabatin dos homber bistí na blanku pará banda di nan. Nan a bisa: “Hombernan di Galilea, pakiko boso ta para mira na shelu? E Hesus aki, ku a kita for di boso pa E bai shelu, lo bini bek den e mésun forma ku boso a mir’E bai”.

(Ech 2, 1-32) 

Ora fiesta di Pentekoste a yega, tur e siguidónan di Hesus tabata huntu na e mésun lugá. Diripiente un zonido manera un biento fuerte a bini for di shelu y a yeá henter e kas kaminda nan tabata. Algo manera kandela a paresé: el a parti su mes na lenga ku a bai para riba kada un. Nan tur a keda yená ku Spirito Santo y a kuminsá papia na otro lenga, según Spirito Santo tabata inspirá nan. T’asina ku tabatin hudiu deboto fo’i tur parti di mundo ta biba na Herusalem. Ora e hendenan a tende e zonido, nan a bosha bini hunto y a keda sorprendí, pasobra kada ken tabata tende Apostelnan papia su mes lenga. Nan a keda babuká, y asombrá nan a bisa: “No ta galileo tur e hendenan ei, ku ta papia ta? Ta kon nos kada un por tene nan papia nos mes lenga? Nos tur aki ta tende nan papia den nos propio lenga tokante e obranan grandi di Dios!” Nan tur a keda asombrá: nan no tabata sa kiko pensa. Nan tabata puntra otro: “Kiko esaki ta nifiká?” Pedro, pará meimei di e otro Apostelnan, a tuma palabra, bisando na bos halto: “Habitantenan di Hudea, y boso tur ku awor aki ta presente na Herusalem, komprondé bon, kiko ta pasa awe! Boso tur skucha loke mi ta bai bisa boso! Ta trata di Hesus di Nazaret, Esun, Kende Su mishon Dios a revelá, hasiendo mei-mei di boso obranan maravioso manera boso sa. Sinembargo boso a entreg’E na hendenan, ku no konosé Lei di Dios. Boso a klab’E na krus y a mat’E. Pero Dios a resusit’E, El a libr’e di laso di morto. Hesus Su alma no a keda den reino di mortonan. Su kurpa no a sufri ningun korupshon. Dios a lanta e mésun Hesus for di morto. Di esei nos tur ta testigo”.

(Rev. 11,19; 12,1-10) 

Den un vishon, ami, Huan a mira ku tempel di Dios den shelu a  habrí y e arka di Su aliansa a bira visibel den Su tempel. Un señal grandi a paresé na shelu: un muhé bistí ku solo, bao di su pianan luna y riba su kabes un korona di diesdos strea. E tabata na punta di duna lus, y e dolónan di parto tabata pon’é grita. A paresé un otro señal mas na shelu: un dragon grandi korá korá ku shete kabes y dies kachu y riba kada kabes un diadema. Ku su rabo, e dragon grandi a bari kita un terser partri di e streanan na shelu, y a benta nan riba tera. E dragon tabata pará dilanti di e muhé, pa devorá su Yiu asina e Yiu nase. E muhé a duna lus na un Yiu, un Yiu homber, destiná pa goberná tur nashon ku bara di heru. Pero e muhé a hiba su Yiu lihé serka Dios y a pon’e riba trono di Dios. E muhé a hui bai den desierto, kaminda Dios a soru pa un pleki kaminda lo a kuida e muhé mildoshensesenta dia. Y ami, Huan, a tende un stem den shelu bisa duro: “Awor salbashon di Dios a bini, su poder y Su reinado y e outoridat di Su Mesias”.  

(Judit 13, 18-20; 15, 9-10) 

Bendishoná bo ta, mi Yiu, Dios Altísimo a halsa bo riba tur muhé di mundo. Bendihoná ta Señor Dios, Kreador di shelu y tera, Kende a mustra bo kiko bo mester a hasi pa pleche kabes di nos enemigu mortal. En berdat, esnan ku ta rekonosé Dios Su poder, semper lo keda korda bo konfiansa den Dios. Mare Dios por hasi bo famoso semper y duna bo tur loke ta bon, pasobra bo ta honor di nos pueblo. Bo a sigui e úniko bon kaminda, e kaminda di Dios. bo ta fama di Herusalem. Bo ta orguyo grandi di Israël. Bo ta prenda presioso di nos pueblo. Bo a hasi tur e kosnan ei riba bo mes, bo a trese salbashon pa Israël. Esei a agradá Señor Dios. Señor todopoderoso a bendishoná bo te den eternidat.

Tata Santu, ku ta den shelu, manda nos Bo Spiritu Santo, pa nos bista y nos kurason ta fihá riba e biennan ku no ta kaba nunka y kaminda nos legria berdadero ta. Amèn.

Di dos stashi / The 2nd Station

HESUS TA TUMA SU KRUS RIBA SU SKOUDER

V/ Nos ta adorá Bo Kristu
I nos ta bendishoná Bo.
R/ Pasobra Bo a salba mundu
Pa Bo Santa Krus.

Evangelio di san Mateo
“Soldánan di gobernador a hib’E den patio di palasio.
Aya nan a jama henter nan trupa huntu. Nan a kita su paña, i a bisti’E un kapa kòrá. Nan a pone un korona di sumpiña riba su kabes, a hinka un palu di kaña den su man drechi i a hasi bofon di djE, nan a hinka rudia su dilanti, bisando:’Biba rei di hudiunan!’
Nan a skupi den su kara, kohe e palu di kaña, dal Hesus kuné riba su kabes.
Despues di a kansa di hasi bofon di Hesus, nan a kita e kapa kòrá i a bisti’E
su mes paña atrobe. Kaba nan a hib’E bai krusifik’E “. (Mt 27,27-31)

Reflekshon
Nan ta obligá Hesus di karga un krus asina pisá. Nan mes sa kon pisá e ta,
i su rantnan ta skerpi. Tòg Hesus a tum’é. Hesus a karg’é p’asina E libra nos di piká.

Orashon
Mi bon Hesus, Abo a karga un krus pa libra nos. Esaki tambe ta un
ehèmpel pa nos. Siña nos di no keha ora nos ta malu, ora nos tin di 
hasi un trabou i tur kos ta kai difisil.

Nos Tata……
V/ Señor, tene miserikòrdia
R/ ku nos, pober pekador

Kantika
Un mirada di fe, ta loke por salba un pekador i si bo bai serka Kristu Hesus, E ta duna pordon, pasombra un mirada di fe, 
ta loke por salba un pekador.

Di tres Stashi / The 3rd Station

HESUS TA KAI BOU DI SU KRUS

V/ Nos ta adorá Bo Kristu
i nos ta bendishoná Bo.
R/ Pasombra Bo a salba mundu
pa Bo Santa Krus.

Promé karta di San Pedro
“Kristu a sufri pa boso i a laga un ehèmpel pa boso sigi su pasonan:
E ku no a kometé piká i den su boka no a haña engaño. Ora nan tabata sundr’E, no a sundra meskos. Ora E tabata sufri, no a hasi ningun menasa, ma a laga esei na Esun ku ta husga ku hustisia”. (1Pedr.2,21-24)

Reflekshon
E kaminda di stat ta malu, Hesus ta trompeká. E ta kai abou, soldanan ta 
sundr’E i ta papia malu kun’E. I maske su kurpa no tin forsa, E ta kohe su krus atrobe i ta sigi su kaminda.

Orashon
Hesus, mi Salbador, nan a trata Bo pió ku un animal. Nos ta pidi Bo, siña nos tambe ora ku hendenan ta falta nos, asta ora ku un hende kier hasi kos di brutu ku nos, i ora nan ta gaña riba nos. Duna nos forsa pa nos wanta tur kos.

Nos Tata…..
V/ Señor, tene miserikòrdia
R/ ku nos pober pekador.

Kantika
Kristu nos Señor, kuantu B’a sufri,
Kristu nos Señor, ki gran dolor.
Kristu, nos no sa ni por balotá
ki Bo kurason a soportá. 2x

Di kuater stashi / The 4th Station

HESUS TA TOPA KU SU MAMA TRISTU

V/ Nos ta adorá Bo Kristu
I nos ta bendishoná Bo.
R/ Pasombra Bo a salba mundu
pa Bo Santa krus.

Evangelio di San Lukas
“Despues ku Simeon a bendishoná nan, el a bisa Maria su Mama;
‘Mira e Yu aki ta destiná pa kaida i lantamentu di hopi hende den Israel, komo un señal di kontradikshon, i Bo mes alma tambe lo keda traspasá pa un spada” (Lk 2, 34-35)

Reflekshon
Meimei di tur e hendenan riba kaya, Maria tabata buska un manera P’E 
por wak su Yu. Nan ta stot’E, nan ta push’E un banda. Hesus su wowo ta jena ku awa ora e mira su Mama, Maria su wowonan meskos. 
Ki ferdrit mas grandi e momentu ei ta ! Un Mama mirando su Yu di e manera ei.

Orashon
Mi bon Hesus, Bo a wanta tristesa ora Bo a mira bo Mama, Bo kurason i kurason di Bo Mama a kibra. Duna nos grasia di wanta hopi 
kos di famianan i siña nos di no ninga ningun sakrifisio, pasombra di e manera aki, nos ta bira felis.

Nos Tata….. of Mi ta kumindá Bo, Maria…….
V/ Señor, tene miserikòrdia 
R/ ku nos, pober pekador

Kantika
Si Kristu no kambia mi bida, si Kristu no kambia mi ser
Si Kristu no kambia mi bida, ta ken mi ke pa kambi’é? 2x

Di sinku stashi / The 5th Station

SIMON DI SYRENE TA YUDA HESUS KARGA SU KRUS

V/ Nos ta adorá Bo Kristu
i nos ta bendishoná Bo.
R/ Pasombra Bo a salba mundu
Pa Bo Santa Krus.

Evangelio di San Lukas
“Ora ku nan tabata hib’E, nan a para un sierto Simon di Syrene, ku tabata
bolbe di kunuku. Nan a pone e krus riba su skouder pa e karg’é tras di Hesus”.
(Lk 23,26)

Reflekshon
Soldánan ta weta ku Hesus su forsanan ta kaba. Pesei nan ta obligá un homber,
Simon di Syrene, pa juda Hesus ku su krus. Simon ta hasi esei kontra su boluntat.

Orashon
Mi bon Hesus, hopi bes nos ta manera Simon di Syrene. Hopi bes forsá nos ta kumpli ku nos debernan, hasi nos amor pa Bo asina grandi, ku nos por traha ku mas amor, pa mi juda mi hendenan ku mas entusiasmo
i generosidat.

Nos Tata …..
V/ Señor, tene miserikòrdia
R/ ku nos, pober pekador.

Kantika
Juntos como hermanos, miembros de una Iglesia, Vamos caminando, al encuentro del Señor. La Iglesia en marcha está,
a un mundu nuevo vamos ya donde reinará el amor, donde reinará la paz.

Di seis stashi / The 6th Station

VERONICA TA SEKA KARA DI HESUS

V/ Nos ta adorá Bo Kristu
I nos ta bendishoná Bo.
R/ Pasombra Bo a salba mundu
Pa Bo Santa Krus.

Karta di San Pablo na Romanonan
“Lo no haña asina fásil un hende ku ta duna su bida pa un hende hustu,
maske ku kisas, den sierto kaso un hende su kurason por move pa hasi esei.
Ma Dios ta mustra su amor pa nos pa medio di esaki: ku Kristu a muri pa nos, 
Tempu ku nos tabata pekador ainda”. (Rom 5,7-8)

Reflekshon
Ata un otro muhé ta juda Hesus. E ta pusha pa bini dilanti. Su kurason
Ta jen di miserikòrdia. Ku un serbete limpi e ta seka kara di Hesus.
E ta limpi’E di sodó i di sanger.

Orashon
Mi bon Hesus, ki agradabel ta e obra di miserikòrdia. Duna nos ánimo pa nos, tambe por mustra miserikòrdia na otro hende. Laga nos konsolá esnan ku ta tristu. Laga nos juda tambe tur esnan ku ta mas pober ku nos.

Nos Tata……
V/ Señor tene miserikòrdia
R/ ku nos, pober pekador. 

Kantika
Laga un parti pan awor ku otro,
parti pan na su ruman, anto Kristu mes lo ta presente si nos ke parti ku nos ruman.

Di siete stashi / The 7th Station

HESUS TA KAI PA DI DOS BES BOU DI SU KRUS

V/ Nos ta adorá Bo Kristu
i nos ta bendishoná Bo.
R/ Pasombra Bo a salba mundu
pa Bo Santa Krus.

Profeta Isaias
“El a karga nos sufrimentu, El a wanta nos dolornan. El a keda machiká bou di 
peso di nos pikánan; t’E a wanta e kastigu pa nos sali liber i ta pa su heridanan ku 
nos a haña kurashon. Pero Señor Dios a lag’E karga tur nos maldat”. (Is 53, 4-6)

Reflekshon
Henter kurpa di Hesus ta morde. E ta tembla di tantu doló. Un kaminda asina malu,
jen di buraku. Atrobe Hesus ta kai na suela . Su wowonan i su nanishi ta kore
sanger. Su mannan ta tur raspá.

Orashon
Mi bon Hesus, kuantu stimashon Bo tin pa nos. Drumi plat abou na suela,
i ainda Bo ta kòrda riba nos. Ta kiko nos por debolbé Bo, pa tur loke Bo kier
wanta pa nos. Hasi nos bibá simpel, siña resa hopi, i warda nos di tur kos malu.

Nos Tata…..
V/ Señor , tene miserikòrdia
R/ ku nos, pober pekador.

Kantika
Mi ta stima Bo di henter mi kurason 2x
ni maske kiko ku bo hasi mi ta stima Bo tòg
pasombra den Hesus nos ta ruman.

Di ocho stashi / The 8th Station

HESUS TA TOPA KU MUHENAN KU TA JORA

Selebrante; Nos ta adorá Bo Kristu
i nos ta bendishoná BO.
Tur; Pasombra Bo a salba mundu
pa Bo Santa Krus.

Evangelio di San Lukas
“Un kantidat grandi di hende tabata sigi su tras, tambe hende muhénan tabata
bati nan pechu i tabata jor’E. Hesus a drei su kara pa nan i a bisa: “Yu muhénan 
di Herusalem, no jora pa Mi, ma jora riba boso mes i boso juinan”. (Lk23, 27-31)

Reflekshon
No laga nos preokupá nos mes ku faltanan di otro, pero preokupá nos ku nos mes faltanan i esnan di nos famia, i laga nos pidi Tata den shelu pordon pa tur nos pikánan.

Orashon
Mi bon Hesus, asta den oranan di tristesa i di doló, Bo ta korda otronan Mas ku Bo. Siña nos pa no exigi hopi atenshon pa nos mes, Ora kualke pena Ta pone nos kurason sufri, manda nos Bo forsa i Bo grasia, pa nos wanta tur kos.

Nos Tata….
V/ Señor, tene miserikòrdia
R/ ku nos, pober pekador.

Kantika
Pordon mi Señor, pordon, oh mi Dios,
komo m’a peka kontra Bo.
Pordon bin librami, oh Señor, di tur kadena di maldat.
Mi’n ke bolbe heridá Bo mas ku mi piká. 2x

Di nuebe stashi / The 9th Station

HESUS TA KAI PA DI TRES BES

Selebrante; Nos ta adorá Bo Kristu
I nos ta bendishoná Bo.
Tur; Pasombra Bo a salba mundu
pa Bo Santa Krus.

Profeta Isaias
“Ku pasenshi El a wanta tur maltrato, ni un biaha só E no a habri su boka;
manera un karné dilanti peladó, E no a keha, E no a habri su boka. Manera un hende sin derecho , sin defensa, nan a lastr’E bai kun’E. Nan a rank’E for di tera di bibunan i pa nos pikánan El a keda entregá na morto”. (Is 53, 7-9)

Reflekshon
Hesus no por tene su krus mas. Su lomba ta tur habri na herida.
E tin doló insoportabel. E korona di sumpiña ta kima su kabes. Atrobe e ta kai abou, i ta dal su kabes duru kontra di un piedra.

Orashon
Mi bon Hesus, esaki ta un ofensa pa Bo, Dios di shelu i di tera.
Rondoná di hendenan ku ta grita tur sorto di palabra mahos.
Tur hende a bandoná Bo. Ni bo Apòstelnan no ta huntu ku Bo.
Nò, ni un hende pa lanta Bo. Siña nos di wanta soledat, manera Abo a want’é. I siña nos tambe soportá ingratitut.

Nos Tata….
V/ Señor, tene miserikòrdia
R/ ku nos, pober pekador.

Kantika
Nos tin un amigu ku stima nos, ku stima nos 2x
Nos tin un amigu ku stima nos, su nòmber ta Hesus.
Ku stima nos, ku stima nos, ku stima nos ku su tierno amor.

Di dies stashi / The 10th Station

NAN TA KITA HESUS SU PAÑANAN

Selebrante; Nos ta adorá Bo Kristu
I nos ta bendishoná Bo.
Tur; Pasombra Bo a salba mundu
pa Bo Santa Krus.

Evangelio di San Marko
“Nan a hiba Hesus e lugá, jamá Gólgota, loke ta nifiká; Karpachi.
Aya nan a duna Hesus biña, mesklá ku mira, pa bebe, pero E no a tum’é.
Despues nan a klab’E na krus i a parti su bistínan, tirando lot, pa mira kiko
kada ún lo haña”. (Mk 15, 22-25)

Reflekshon
Awor nan ta jega na kabes di seru Kalvario. Sòldánan ta ranka pañanan di Hesus
for di su kurpa. Tur su heridanan ta habri atrobe. Ku wowonan será E ta wanta
tur e ofensanan aki.

Orashon
Mi bon Hesus, pikánan di nos tur ta poneBo wanta e berguensa aki.
Laga Bo grasia kai riba nos i riba tur mucha, i tur hende grandi tambe.
Tene nos leu for di tur loke ta malu den bo bista.

Nos Tata…..
V/ Señor, tene miserikòrdia
R/ ku nos, pober pekador.

Kantika
Escucha el eco de mi canto, escucha mis canciones
que son oraciones, para el corazón 2x
Yo canto alegrando la vida, yo canto desterrando el dolor
La ra, la,la,la,la,